കേരള പ്രവാസി പെന്ഷന് പദ്ധതി

പദ്ധതിയുടെ സവിശേഷതകള്

2008ലെ പ്രവാസി മലയാളി ക്ഷേമനിധി നിയമത്തിന് കീഴിലാണ് പ്രവാസി പെന്ഷന് പദ്ധതി വരുന്നത്. കേരള പ്രവാസി ക്ഷേമ ബോര്ഡാണ് ഈ പദ്ധതി നടപ്പിലാക്കുന്നത്. സംസ്ഥാനത്തിന് പുറത്ത് ജോലി ചെയ്ത ഓരോ മലയാളിക്കും (വിദേശത്താണെങ്കിലും ഇന്ത്യയിലെ മറ്റിടങ്ങളില് ആണെങ്കിലും) ജോലിയില് നിന്ന് വിരമിച്ചതിന് ശേഷം മാന്യമായ വരുമാനം ലഭ്യമാക്കുക എന്നതാണ് പദ്ധതിയുടെ കാതല്. കുറഞ്ഞത് രണ്ട് വര്ഷമെങ്കിലും മറുനാട്ടില് ജോലി ചെയ്ത് കേരളത്തില് തിരിച്ചെത്തുന്നവര്ക്ക് ഈ പദ്ധതിയുടെ ആനുകൂല്യം ലഭിക്കും.

ഈ പദ്ധതിയുടെ സവിശേഷതകള് എന്തെല്ലാമാണെന്ന് നോക്കാം.

1. പെന്ഷന് ലഭിക്കുന്നത് എപ്പോള്

   പദ്ധതിയില് അംഗങ്ങളായവര്ക്ക് 60 വയസ്സിന് ശേഷം അര്ഹതപ്പെട്ട തുക പെന്ഷനായി ലഭിക്കും.

2. യോഗ്യത

   19 വയസ്സിനും 60 വയസ്സിനും ഇടയില് പ്രായമുള്ള, കേരളത്തിന് വെളിയില് ജോലി ചെയ്യുന്ന എല്ലാ മലയാളികള്ക്കും ഈ പദ്ധതിയില് അംഗങ്ങളാകാം. സര്ക്കാര് ഉദ്യോഗസ്ഥര് പദ്ധതിക്ക് അര്ഹരല്ല.

3. വിവിധ വിഭാഗങ്ങള്

   കാറ്റഗറി 1A- വിദേശത്ത് ജോലി ചെയ്യുന്ന മലയാളികള്.

   കാറ്റഗറി 1 B - വിദേശത്ത് കുറഞ്ഞത് രണ്ട് വര്ഷമെങ്കിലും ജോലി ചെയ്ത് തിരിച്ചെത്തിയ മലയാളികള്.

   കാറ്റഗറി 2 A- ഇന്ത്യയിലെ മറ്റ് സംസ്ഥാനങ്ങളില് ജോലി ചെയ്യുന്ന മലയാളികള്.

4. വിഹിതങ്ങള്

   ഇന്ത്യയ്ക്ക് പുറത്ത് ജോലി ചെയ്യുന്നവര് പ്രതിമാസം 300 രൂപ അടയ്ക്കണം. ഇന്ത്യയിലെ മറ്റിടങ്ങളില് ജോലി ചെയ്യുന്നവര് പ്രതിമാസം 100 രൂപ അടയ്ക്കണം.

5. റദ്ദാക്കല്

   ഒരു വര്ഷം തുടര്ച്ചയായി വിഹിതം അടച്ചില്ലെങ്കില് പദ്ധതി അംഗത്വം റദ്ദാക്കപ്പെടും. പിഴയോടുകൂടി അടയ്ക്കാനുള്ള തുക ഒടുക്കിയാല് അംഗത്വം പുതുക്കപ്പെടും.

6. വിവിഹ കാലയളവ്

   ഏറ്റവും കുറഞ്ഞത് അഞ്ച് വര്ഷമെങ്കിലും വിഹിതം അടച്ചിരിക്കണം.

7. പെന്ഷന് തുക

   ഏത് വിഭാഗത്തിലാണ് പെടുക എന്നതിനനുസരിച്ച് 60 വയസ്സ് മുതല്ക്ക് 2,000 രൂപ മുതല് 3,500 രൂപ വരെ പെന്ഷന് ലഭിക്കാം.

8. ആനുകൂല്യങ്ങള്

   തുടര്ച്ചയായി അഞ്ച് വര്ഷത്തില് കൂടുതല് കൃത്യമായി വിഹിതം അടയ്ക്കുന്ന അംഗങ്ങള്ക്ക് 5 വര്ഷത്തിന് ശേഷം ഓരോ വര്ഷവും മിനിമം പെന്തുകയുടെ 3 ശതമാനം അധികമായി ലഭിക്കും.

9. മറ്റ് ആനുകൂല്യങ്ങള്

   അംഗങ്ങള്ക്ക് പ്രവാസി ക്ഷേമ ഫണ്ടിലൂടെ ആരോഗ്യ, വിദ്യാഭ്യാസ, കുടുംബക്ഷേമ സഹായങ്ങള് ലഭ്യമാകും.

അപേക്ഷിക്കേണ്ട രീതി

കേരള പ്രവാസി ക്ഷേമ ബോര്ഡിന്റെ വെബ്സൈറ്റ് സന്ദര്ശിക്കുക

സര്വ്വീസ് എന്നത് തിരഞ്ഞെടുക്കുക

ഓണ്ലൈന് രജിസ്ട്രേഷന് മെനുവിലെ ഓണ്ലൈനായി അപ്ലൈ ചെയ്യുക എന്നത് തിരഞ്ഞെടക്കുക.

അപേക്ഷ ഫോമില് ഏത് വിഭാഗമാണെന്ന് തിരഞ്ഞെടുക്കുക

ആവശ്യമായ വിവരങ്ങള് നല്കുക

ആവശ്യമായ രേഖകളുടെ സോഫ്റ്റ്കോപ്പികള് സമര്പ്പിക്കുക

സബ്മിറ്റ് എന്ന ബട്ടണ് ക്ലിക്ക് ചെയ്യുക

ആവശ്യമായ രേഖകള്

തിരിച്ചറിയല് രേഖ - സാധുതയുള്ള പാസ്പോര്ട്ട്, ആധാര് കാര്ഡ്, ജനന സര്ട്ടിഫിക്കറ്റ്, വോട്ടര് ഐഡി എന്നിവയില് ഏതെങ്കിലും ഒന്ന്.

വിലാസം തെളിയിക്കുന്ന രേഖ - കറന്റ്, വെള്ളം പോലുള്ള യൂട്ടിലിറ്റി ബില്ലുകള്, ബാങ്കിലെ പാസ്പുക്ക്, ആധാര്കാര്ഡ്, പാസ്പോര്ട്ട്

പ്രധാന രേഖകള് - സാധുവായ വിസ, പാസ്പോര്ട്ട്

മറ്റ് രേഖകള് - പാസ്പോര്ട്ട് സൈസ് ഫോട്ടോ, ഒപ്പിന്റെ ഡിജിറ്റല് പകര്പ്പ്

പദ്ധതി പ്രവാസി മലയാളികള്ക്ക് എങ്ങനെ ഗുണകരമാകുന്നു?

ദശാബ്ദങ്ങളോളം വിദേശത്തും മറുനാടുകളിലും കഷ്ടപ്പെട്ട് ജോലി ചെയ്യുന്നവരാണ് പ്രവാസികള്. വരുമാനത്തെ കരുതി ശാരീരിക അധ്വാനം കൂടുതലുള്ളതോ സുരക്ഷിതമല്ലാത്തതോ ആയ ജോലികള് പോലും ചെയ്യാന് ഇവര് പലപ്പോഴും നിര്ബന്ധിതരാകുന്നു. എന്നിട്ടും ഇവര് നാട്ടില് തിരിച്ചെത്തുമ്പോള് സാമ്പത്തിക അരക്ഷിതാവസ്ഥയാണ് ഇവരെ കാത്തിരിക്കുന്നത്. കാര്യമായ സമ്പാദ്യമോ പെന്ഷന് പരിരക്ഷയോ ഇവര്ക്ക് ഉണ്ടാകാറില്ല. പ്രത്യേകിച്ച് വരുമാനം കുറഞ്ഞ, അസംഘടിത മേഖലകളില് ജോലി ചെയ്തവര്ക്ക്.

ഇവര്ക്ക് കൈത്താങ്ങാണ് പ്രവാസി പെന്ഷന് പദ്ധതി. ഈ പദ്ധതിയിലൂടെ അവര്ക്ക് ലഭിക്കുന്ന ഗുണങ്ങള്:

1. ആജീവനാന്ത സാമ്പത്തിക സുരക്ഷ

   പ്രതിമാസം 2000 രൂപയാണെങ്കില് പോലും വാര്ധക്യകാലത്ത് അടിസ്ഥാനപരമായ സാമ്പത്തിക സുരക്ഷിതത്വം ഇവര്ക്ക് കൈവരുന്നു. കാര്യമായ സമ്പാദ്യമില്ലാതെ നാട്ടില് എത്തിയവര്ക്ക് ഇത് വലിയ ആശ്വാസമായിത്തീരുന്നു.

2. സമൂഹം ചേര്ത്തുനിര്ത്തുന്നു

   സംസ്ഥാന സര്ക്കാരിന്റെ പിന്തുണയോടെയുള്ള ഈ ക്ഷേമ പദ്ധതി, പ്രവാസി മലയാളികള് കേരള സമൂഹത്തിന്റെ അവിഭാജ്യ ഘടകമാണെന്നും സമ്പദ് ഘടനയ്ക്ക് അവര് നല്കിയ സംഭാവനകള് സമൂഹം മറക്കില്ലെന്നും ഉറപ്പാക്കുന്നു.

3. പ്രവാസം മതിയാക്കാന് പ്രചോദനമേകുന്നു

   നാട്ടിലേക്ക് തിരിച്ചുപോയാലും സാമ്പത്തിക സുരക്ഷ ഉറപ്പാണെന്ന തോന്നല് പ്രവാസികളില് ജനിപ്പിക്കുന്നു. ഇത് നാട്ടിലേക്ക് മടങ്ങാനുള്ള പ്രചോദനമേകുന്നു.

4. കുടുംബങ്ങള്ക്ക് സുരക്ഷ

   പ്രവാസികളുടെ കുടുംബത്തിനും ഈ പദ്ധതി സാമ്പത്തിക സുരക്ഷയേകുന്നു. കുടുംബത്തിന്റെ അത്താണിയായിരുന്ന ഒരംഗം പ്രവാസം മതിയാക്കി മടങ്ങിയെത്തിയാലും പെന്ഷനിലൂടെ മാന്യമായ ജീവിതസാഹചര്യങ്ങള് ആ കുടുംബത്തിന് ലഭിക്കുന്നു.

5. മറ്റ് ക്ഷേമ പദ്ധതികളിലേക്കുള്ള വാതില്

   പ്രവാസി പെന്ഷന് പദ്ധതിയില് അംഗമാകുന്നതിലൂടെ മറ്റ് നിരവധി ക്ഷേമ പദ്ധതികള്ക്കുള്ള അവസരങ്ങള് അവര്ക്ക് മുമ്പില് തുറക്കപ്പെടുന്നു. വിദ്യാഭ്യാസ ഗ്രാന്റുകള്, ചികിത്സാസഹായം, ഇന്ഷുറന്സ് പരിരക്ഷ, കുടുംബ പെന്ഷന് എന്നിവ അവയില് ചിലതാണ്. ഇത് പ്രവാസി കുടുംബങ്ങള്ക്ക് സമഗ്രമായ സുരക്ഷ വാഗ്ദാനം ചെയ്യുന്നു.

പ്രവാസികള്ക്കുള്ള മറ്റ് ക്ഷേമ പദ്ധതികള്

പ്രവാസി ക്ഷേമ പദ്ധതി കേരളത്തിലെ പ്രവാസികള്ക്കുള്ള ക്ഷേമ പദ്ധതികളില് ഒന്നുമാത്രമാണ്. ഏതാണ്ട് 500,000 അംഗങ്ങളുള്ള കേരള പ്രവാസി ക്ഷേമ ഫണ്ട് മറ്റ് നിരവധി പദ്ധതികള് കൈകാര്യം ചെയ്യുന്നുണ്ട്.

• പ്രവാസി കുടുംബ പെന്ഷന് പദ്ധതി - പദ്ധതിയില് അംഗമായ പ്രവാസി മരണപ്പെട്ടാല് അവരുടെ കുടുംബത്തിന് അംഗത്തിന് ലഭിക്കേണ്ട തുകയുടെ 50 ശതമാനം കുടുംബത്തിന് പെന്ഷനായി ലഭിക്കും.
• വികലാംഗര്ക്കുള്ള പെന്ഷന് - കുറഞ്ഞത് 3 വര്ഷെങ്കിവും വിഹിതം അടയ്ക്കുകയും ശേഷം വികലാംഗത്വം വരികയും ചെയ്ത അംഗങ്ങള്ക്ക് ഈ പെന്ഷന് ലഭിക്കും.
• മരണശേഷമുള്ള സഹായം - അസുഖം മൂലമോ അപകടം മൂലമോ അംഗം മരണപ്പെട്ടാല് കുടുംബത്തിന് 50,000 രൂപ വരെ സഹായം ലഭിക്കും.1B വിഭാഗത്തില് പെട്ടയാളാണ് മരിച്ചതെങ്കില് 30,000 രൂപ വരെ സഹായം. മുന്നാമത്തെ വിഭാഗത്തില് പെട്ടവര്ക്ക് 25,000 രൂപ സഹായം ലഭിക്കും.
• ചികിത്സാ സഹായം - അസ്സല് ബില്ലുകളും ഡോക്ടറുടെ സാക്ഷ്യപത്രവും ഉണ്ടെങ്കില് ചികിത്സാച്ചിലവിനായി 50,000 രൂപ വരെ സഹായം ലഭിക്കും. പക്ഷേ അംഗീകൃത ആശുപത്രികളിലെ ചികിത്സയ്ക്കാണ് ഈ ആനുകൂല്യം ലഭിക്കുക. മറ്റേതെങ്കിലും ചികിത്സാ ആനുകൂല്യങ്ങള് കൈപ്പറ്റിയവര്ക്ക് ഈ സഹായം ലഭിക്കില്ല. പെന്ഷന് ലഭിക്കുന്നവര്ക്ക് ചികിത്സാസഹായം ഉണ്ടാകില്ല.
• വിവാഹ, വിദ്യാഭ്യാസ ഗ്രാന്റുകള് - 3 വര്ഷം വിഹിതം അടച്ച, പദ്ധതിയില് അംഗങ്ങളായുള്ളവരുടെ പെണ്കുട്ടികളുടെ വിവാഹത്തിന് 10,000 രൂപ വരെയും 2 വര്ഷം വിഹിതം അടച്ചവരുടെ മക്കളുടെ ഉന്നത വിദ്യാഭ്യാസത്തിന് സഹായവും ലഭിക്കും
• ഗര്ഭിണികള്ക്കുള്ള സഹായം - രണ്ട് വര്ഷത്തോളം വിഹിതം അടച്ച സ്ത്രീകള്ക്ക് 3,000 രൂപ പ്രവസാനുകൂല്യമായി ലഭിക്കും. ഗര്ഭഛിദ്രം സംഭവിച്ചാല് 2,000 രൂപയും ലഭിക്കും.
• പാര്പ്പിട സഹായം - 5 വര്ഷം കൃത്യമായി വിഹിതം അടച്ചവര്ക്ക് പാര്പ്പിട വായ്പയ്ക്ക് വേണ്ട സാമ്പത്തിക സഹായം നല്കും.

പ്രവാസി പെന്ഷന് പദ്ധതി ഒരേ സമയം ഒരു സാമ്പത്തിക ഉപാധിയും പ്രവാസി സമൂഹത്തിനുള്ള കൈത്താങ്ങുമാണ്. കേരളത്തിന്റെ വികസനത്തിനും സമ്പദ് വ്യവസ്ഥയ്ക്കും പ്രവാസികള് നല്കിയ സംഭാവനകളുടെ തിരിച്ചറിയല് കൂടിയാണ് ഈ പദ്ധതി. എല്ലാ മാസവും ചെറിയ തുക മാറ്റിവെക്കുന്നതിലൂടെ വാര്ധക്യ കാലത്ത് സ്ഥിരതയുള്ള വരുമാനം ഉറപ്പാക്കാന് പ്രവാസികള്ക്ക് ഈ പദ്ധതിയിലൂടെ സാധിക്കുന്നു.